
第一世噶玛巴教言集1KM15བདེ་མཆོག་གི་ནང་གི་མཆོད་པ་བཞུགས་སོ། །
1-2-154a
༄༅། །བདེ་མཆོག་གི་ནང་གི་མཆོད་པ་བཞུགས་སོ། །
༄༅། །བདེ་མཆོག་གི་ནང་གི་མཆོད་པ་བཞུགས་སོ། །བདེ་ཆེན་རང་བཞིན་གཉིས་མེད་རོལ་པའི་དཔལ། །དྲི་མེད་རྣམ་དག་ཨུཏྤལ་སྔོན་པོའི་མདོག །གཞན་གྱི་དོན་དུ་ཐུགས་རྗེའི་སྐུ་སྤྲུལ་པ། །བདེ་བའི་འབྱུང་གནས་ཁྱོད་ལ་ཕྱག་འཚལ་ལོ། །དཔལ་བདེ་མཆོག་གི་ནང་གི་མཆོད་པ་བྱེད་པར་འདོད་པས། དབེན་ཞིང་ཉམས་དགའ་བའི་གནས་སུ། མཎྜལ་ལ་སོགས་བའི་རྣམ་ལྔས་བྱུག །དྲི་ཞིམ་པོ་དང་ཆང་གིས་བྱུག །དེ་ནས་མགྲོན་དཀོན་མཆོག་སྤྱིའི་མཎྜལ་དང་། བླ་མའི་མཎྜལ་བྱ། དབུས་སུ་མཎྜལ་པདྨ་འདབ་བཞི་པ་བྲི། འབྱོར་ན་ཐོད་པ་ལྔའི་དབུས་མའི་ནང་དུ་རྡོ་རྗེ་ཧཱུྃ་གིས་མཚན་པ་གཅིག་བྲི། བཞི་པོའི་ནང་དུ་རྡོ་རྗེ་དང་། རིན་ཆེན་དང་། པདྨ་དང་། རྡོ་རྗེ་རྒྱ་གྲམ་བྲི། ཡང་ན་བཞི་པོའི་ནང་དུ་ཌཱ་ཀིའི་ངོ་བོ་ཐིག་ལེ་རེ་རེ་བྲི། མ་འབྱོར་ན་ཐོད་པ་གཅིག་གི་ནང་དུ་རྡོ་རྗེ་ཧཱུྃ་དྲི་རྣམ་པ་ལྔ་བདུད་རྩི་ཨ་མྲི་ཏ་དང་སྦྱར་བའི་སྣ་ཚོགས་གིས་མཚན་པ་བྲིས་
1-2-154b
ལ༑ ཆང་གིས་བཀང་ལ་དབུས་སུ་བཞག །པདྨའི་འདབ་མ་བཞི་ལ་ཤར་རྡོ་རྗེ་དང་། ལྷོ་རིན་པོ་ཆེ་དང་། ནུབ་པདྨ་དང་། བྱང་རྡོ་རྗེ་རྒྱ་གྲམ་བཞི་བྲི། ཡང་ན་ཐིག་ལེ་རེ་རེ་བྲི། མཎྜལ་མཆོད་པ་འབྱོར་ཚད་ཀྱིས་བསྐོར༑ མཚམས་བཞིར་གཏོར་མ་རེ་རེ་བཞག །དེ་ནས་མདུན་དུ་མཆོད་པ་རྣམ་པ་ལྔ། བདུད་རྩིའི་མཆོད་པ་དང་དྲུག་བཤམ། ཚོགས་ཀྱི་ཡོ་བྱད་འབྱོར་ཚད་བཤམ། ལག་མཆོད་ཀྱི་རྒྱུ་ཐོད་པ་མཚན་ལྡན་ཆང་གིས་བཀང་བ་ཨ་མྲྀ་ཏ་བླུག་ལ་རང་གི་གཡོན་དུ་བཞག །དཀོན་མཆོག་སྤྱིའི་མཆོད་པ་འབྱོར་ཚད་བཤམ། ཚོགས་ཀྱི་ཡོ་བྱད་འབྱོར་ཚད་བཤམ། དེ་ནས་རང་ཉིད་སྟན་བདེ་བ་ལ་འདུག་ལ། སེམས་བསྐྱེད་བྱས་ལ༑ བླ་མ་དང་དཀོན་མཆོག་སྤྱན་དྲང་པ་དང་། དཀོན་མཆོག་སྤྱིའི་མཆོད་པ་འབུལ། མཎྜལ་འབུལ་བ་དང་བསྟོད་པ་བྱ། གསོལ་བ་བཏབ་པར་བྱའོ། །དེ་ནས་སྒྲུབ་ཐབས་ནས་འབྱུང་བ་བཞིན་དུ། བསྒོམ་བཟླས་གྲུབ་ཚད་བྱ། དེ་ནས་ཆང་བྱིན་གྱིས་བརླབས་པ་ནི། ཀ་པཱ་ལའི་ནང་དུ་ཆང་ལ་ཐིག་ལེ་ལྔ་བྱས་ལ། དེ་སྐད་ཅིག་གིས་བདེ་མཆོག་ལྷ་ལྔར་བསྐྱེད། ཡབ་ཡུམ་གཉིས་ཀྱི་སྦྱོར་མཚམས་ནས། ཐིག་ལེ་བྱང་ཆུབ་ཀྱི་སེམས་བབ་པས་ཐོད་པའི་ཆང་བདུད་རྩིར་གྱུར་པར་བསམ་མོ། །དེ་ནས་ལག་པ་གཡོན་པས་གཡས་པ་ལ་བསངས། གཡས་པས་གཡོན་པ་ལ་བསངས་ལ། ལག་པ་གཡོན་པའི་མཐིལ་དུ་ཆང་གིས་པདྨ་
1-2-155a
༄༅། །འདབ་མ་བཞི་པ་བྲི། དེའི་ལྟེ་བར་ཆང་གི་ཐིག་ལེ་གཅིག་བྱ། ཕྱོགས་བཞིར་ཆང་གི་ཐིག་ལེ་རེ་རེ་བྲི། ཐིག་ལེ་ལྔ་པོ་ལས་སྐད་ཅིག་གིས་བདེ་མཆོག་ལྷ་ལྔ་བསྐྱེད། དེ་ལ་ཕྱི་ནང་གསང་གསུམ་གྱི་མཆོད་པ་དང་བསྟོད་པ་བྱ། དེ་འོད་དུ་ཞུ་བས་ཐོད་པའི་ཆང་གིས་བདེ་མཆོག་མཆོག་གི་དབུའི་སྟེང་དུ་ཆང་བླུགས་པ་ལ། དེ་ཡང་འོད་དུ་ཞུ་བས་ཐོད་པའི་ཆང་བདུད་རྩིར་གྱུར་པར་བསམ། ཡི་གེ་བདུན་པའི་སྔར་བཟླས་ཤིང་བདུད་རྩི་གཏོར་བས། མཎྜལ་གྱི་དབུས་ཀྱི་ཐོད་པའི་ཆང་གི་རྡོ་རྗེ་ཧཱུྃ་གིས་མཚན་པ་ལ་ཕོག །དེ་ལས་འོད་ཟེར་འཕྲོས་པས་སེམས་ཅན་ཐམས་ཅད་ལ་ཕོག །ལུས་ངག་ཡིད་གསུམ་གྱི་སྡིག་སྒྲིབ་དག ༑སེམས་ཅན་ཐམས་ཅད་བདེ་མཆོག་ཏུ་གྱུར། འོད་ཟེར་ཚུར་འདུས་རྡོ་རྗེ་ཧཱུྃ་གིས་མཚན་པ་ལ་ཐིམ། དེ་ཡོངས་སུ་གྱུར་པ་ལས་བདེ་མཆོག་ལྷ་ལྔ། དབུས་སུ་གཙོ་བོ་ཡབ་ཡུམ། ཤར་དུ་རྡོ་རྗེ་མཁའ་འགྲོ། ལྷོར་རིན་ཆེན་མཁའ་འགྲོ། ནུབ་དུ་པདྨ་མཁའ་འགྲོ། བྱང་དུ་ལས་ཀྱི་མཁའ་འགྲོ། དེ་དག་ཐམས་ཅད་སྐུ་མདོག་ནག་མོ་ཟེར་ཡང་རྡོ་རྗེ་མཁའ་འགྲོ་སྐུ་མདོག་སྔོན་མོ། ལཱ་མ་ལྗང་གུ། དུམ སྐྱེས་མ་དམར་མོ། གཟུགས་ཅན་མ་སེར་མོ་རུས་པའི་རྒྱན་ཆ་ལྔས་བརྒྱན་པ། ཕྱག་གཡས་ན་གྲི་གུག །གཡོན་ན་ཐོད་པ་བདུད་རྩིས་གང་བ་བསྣམས་པ། སྐད་ཅིག་གིས་བསྐྱེད། དེ་ལ་མཆོད་པ་རྣམ་པ་ལྔ་དབུལ། བསྟོད་པ་བྱས་ལ་བསྙེན་པ་ཅི་རིགས་
1-2-155b
པར་སྐྱེལ། དེ་ནས་རང་དང་མདུན་གྱི་ཐུགས་ཀ་ནས་འོད་ཟེར་འཕྲོས་པས། རང་བཞིན་གྱི་གནས་ནས་ཡེ་ཤེས་པ་སྤྱན་དྲངས་ནས་དམ་ཚིག་པ་ལ་གཉིས་སུ་མེད་པར་བསྟིམ་ལ། སྤྱན་འདྲེན་པ་དང་། བསྟོད་པ་དང་༑ གསོལ་འདེབས་ཀྱང་བྱ། བཟླས་པ་ཅི་རིགས་གཅིག་བྱ། བདུད་རྩི་ཚོགས་དང་མཆོད་རྫས་ལ་གཏོར་རོ། །བདུད་རྩི་བྱིན་གྱིས་རླབས་ལ་མདུན་གྱི་ལྷ་ལ་མཆོད་པ་འབུལ། བསྟོད་པ་བྱ། གསོལ་བ་བཏབ༑ དེ་ནས་བདུད་རྩིའི་ཕུད་འབུལ། གཏོར་མ་གཅིག་གཙོ་བོ་ཡབ་ཡུམ་ལ་འབུལ། གཅིག་ཌཱ་ཀི་མ་ལ། གཅིག་ཆོས་སྐྱོང་ཐམས་ཅད་ལ། གཅིག་འགྲོ་བ་རིགས་དྲུག་ཀ་ལའོ་བཏང་ངོ་། །བཀྲ་ཤིས་བརྗོད། ཚོགས་ལ་ལོངས་སྤྱད། བཀྲ་ཤིས་ཀྱི་གླུ་དབྱངས་བླང་། དེ་ནས་ལྷ་གཏོར་བཏང་། དཀྱིལ་འཁོར་གྱི་ལྷ་ལ་བཏང་རག་གི་མཆོད་པ་འབུལ། བསྟོད་པ་བྱ། བཤགས་པ་བྱ། ཡི་གེ་བརྒྱ་པ་བརྗོད། དགེ་བའི་རྩ་བ་རྫོགས་པའི་བྱང་ཆུབ་དུ་བསྔོའོ། །ཡེ་ཤེས་པ་གཤེགས། དམ་ཚིག་པ་རང་ལ་བསྡུ། མཎྜལ་གཤེགས་སོ། །ནང་གི་མཆོད་པ་བྱས་པ་ཡིས། །དམ་ཚིག་ཉམས་པ་དག་པ་དང་། །ཚོགས་གཉིས་རྫོགས་ཤིང་སྒྲིབ་གཉིས་བྱང་། །ཉམས་རྟོགས་འབར་བར་ཐེ་ཚོམ་མེད། །བླ་མ་རྗེ་བཙུན་རིན་པོ་ཆེ་ནཱ་རོ་པའི་བདེ་མཆོག་གི་ནང་གི་མཆོད་པ་རྫོགས་སོ།། །།


目录
བདེ་མཆོག་གི་ནང་གི་མཆོད་པ་བཞུགས་སོ། །